ముచ్చటగా వున్న ముద్దుగుమ్మ ముగ్గులపై కదంతొక్కిన గంగిరెద్దా!
నీ కాళ్ళ కందకుండా కల్యాణి కొలువుదీర్చిన కలల బొమ్మలనేమి చేయగలవోయ్?
***
నిజం లోగిలిలో కల
చిలుక నోట్లోంచి జారిపడ్డ దోర జామపండు కాక మరేమిటీ?
***
నీ కల విలువెంతో
అది తీరిన వెనుక నీ కాంత కంటి చివర నిల్చిన ముత్యాన్ని అడగద్దటోయీ?
వెల్గుల రాజు రోజూ వచ్చి నా వెన్ను నిమరలేదు.
ఆరారగా అమ్మ ధరణి తన గొంతు తడుపుకుంటూ నా ఆర్తి తీర్చలేదు.
ఏదో — గాలీ, ధూళీ దయతలిస్తే రంగులద్దుకున్నాను నేను.
ఓ రేకు అటో ఇటో అయితేనేం, నీ సిగ పాయల నిల్వ సరితూగను ఫో!
నీ పాదార్చనకైనా నన్ను ఎంచుకోరేం? అక్కడ సైతం నన్ను నిల్వనీయరేం?
ఎంతో పుణ్యాత్ములే వీరు ,
ఓ గ్రుడ్డి పూవుకు ఒకింత పుణ్యము పంచగలేరూ?
దైవ సన్నిధిని ఏదో ఓ మూల నాకూ ఓ చోటు చూపించగలేరూ?
వీరు చూపేదేమిటిలే!
నను గన్న రాజుకి నీరెండ మాటున నిల్చి ఒద్దికగా నమస్కరించి, నా కన్నతల్లి పాదాల చుంబింతు నేను.
అంతే కానీ, కొరమానినతనం కొరతెందుకౌతుంది?
ఏకాంతం లో
కొన్నిసార్లు అలవోకగా శరన్మేఘమై స్మృశిస్తూ
కొన్నిసార్లు వసంత కోకిలల్లే కవ్వించి పిలుస్తూ
కొన్నిసార్లు చిత్తడి వానల్లా తడిపేస్తూ
నీతో ముడిపడిన ఙ్ఞాపకాలూ, నా యెదకి
తిరునాళ్ళలో తిరిగినంత అలసటని కలుగ జేస్తాయి!
అదంతా నీతో ఏకరువెట్టి భారం పంచుకుందామంటే,
బ్రతుకు ముద్ర బరువుగా పగలంతా మోసిన నీ కళ్ళు
ఒద్దికగా ఓరువాకిలిలా మూసుకుని మరునాటి పరుగుకేమో, సిద్దమౌతుంటాయి.
కొన్ని -
తామరాకుపై నీటిబొట్లులా నిశ్శబ్దంగా కేవలం…
కొన్ని-
సాయం సాంధ్యన వినిపించీ వినిపించకుండా దూరాన సాగే పాటలా…
కొన్ని-
నిశ్శబ్దంలో ప్రక్కనే వుండి పలు మార్లు ఇబ్బంది పెట్టే బల్లి కూతలా…
కొన్ని-
ఎక్కడ వున్నా నీకై, నీకోసమే,నీలోనే మేము అంటూ ప్రాణ నాడిలా…
****
ఏ బంధమెపుడు ఏ రూపాంతరం చెందుతుందో చెందిందో విశ్లేషణ అసాధ్యం! అనవసరం!
అన్నిటిని ఆస్వాదించుట అనివార్యం!
పాలపుంతపై పరుగూ,
నల్లెరు మీద నడకా–అని ఎంచి
జీవనగమనంలో అలసిన క్షణాన
నిన్ను చేరుకోవాలనుకుంటే
‘నేను మరో అవతారమెత్తి
మీ మధ్యకే వస్తానంటూ’ నువ్వు బయలుదేరేవు!
నా చుట్టూ వున్న నలుగురిలోనూ
నీకై వెతుకులాట నా కొత్త పంథా!
నీకై నేనాలపించే నిశ్శబ్ధ గీతంతో
గాలి గొంతుక కల్పి ఇప్పటికిప్పుడు నీ చెవి జేరి
నీ యెదను రేపిన అలజడి నా దరి జేరిందెలాగో చెప్పుకో!
అర్థమవడానికేముందక్కడ? నా సెల్ మరోమారు మ్రోగుతోందిగా!
ALL YOU WHO SLEEP TONIGHT
ఈ రేయి నిద్రించు మీకెల్లరికి
IV QUATRAINS
చతుష్పాదములు
DARK ROAD
చీకటి బాట
by Vikram Seth
ఈ రహదారిని చీకటి క్రమ్ముకుంది,మరియు నివాసం దూరంగా నిల్చింది.
నిద్రించవోయి ఇప్పుడు, నీవున్న గతిమాలిన స్థితిలోనే.
ఈ రేయి స్వప్నానికి తావు ఈయకు, ఇక రేపూ
భయవిహీనుడవై లేవవోయి, విచారం నుండి సగమైనా విముక్తుడివై.
DARK ROAD
by Vikram Seth
The road is dark, and home is far.
Sleep now, in the poor state you are.
Tonight be dreamless, and tomorrow
wake free from fear, half-free of sorrow.
‘1/4కిలో కొక రూపాయన్న లాభంలేకపోతే ఎలా తల్లీ!’ ?అన్న కూరల బండివాడు
‘1/2కిలో కొన్నాక ఒక రూపాయన్నా మిగుల్చుకోకపోతే ఎలాగయ్యా ?’అనే మధ్యతరగతి ఇల్లాలు
తేలని ఈ వాదనని తేల్చేందుకన్నట్లు ఎండు కొత్తిమీర కట్ట ఉచితముగా పారేసి పరుగెట్టెనతడు
ఇబ్బడి ముబ్బడి ఇరుకు ఇక్కట్ల సందుల
బ్రతుకు బాట ప్రక్కగ విరిసే పకపకలివిలే!
తెలుసుకోవడమే నిర్వాణమా?
ఈసుల రోసుల కంపుల కలబడి, పోరి పోరి వెలికొచ్చి
నీ మనసునకిరవైన ఊసులు ఇరవై చెప్పగలుగుదు నేను
ఇబ్బడి ముబ్బడి ఇరుకు ఇక్కట్ల సందుల
బ్రతుకు బాట ప్రక్కగ విరిసే పకపకలివిలే!
